Situatat e jashtëzakonshme, ose le ta themi ndryshe krizat, janë një mundësi fantastike për të bërë një hap pas e për të monitoruar me vëmendje sjellje të ndryshme njerëzore, profesionale, sociale, politike, kulturore, etj.
Ne kemi vendosur që këtë hap mbrapa ta bëjmë për të studiuar sjelljen e disa nga mediave më prestigjioze në botë. Kjo pasi, në një moment kritik dhe thelbësor për ndarjen e informacionit shpejtë dhe saktë lidhur me COVID – 19, njerëzit “e ngujuar” në shtëpi, më shumë se kurrë e kanë pasur vëmendjen të përqendruar te informacioni i marrë nga mediat e ndryshme.
Ajo që ka rrëmbyer vëmendjen tonë gjatë studimit, është se botuesit e mediave më prestigjioze në botë i janë përgjigjur 4 drejtimeve të ndryshme përgjatë javëve të fundit – rritjes së trafikut në uebsajt, “boom”-it të e-commerce, eventeve të anuluara kudo në botë dhe trendit për fitness në shtëpi.
Më poshtë do t’ju paraqisim disa shembuj se si botues me një gamë të gjerë ndjekësish po i përgjigjen nevojave të lexuesve gjatë shpërthimit të kësaj pandemie:
The Wall Street Journal ka krijuar një seksion më vete lidhur me koronavirusin, kontent të ngjashëm, pyetje dhe përgjigje, si dhe video.
The Wrap ka siguruar 4- fish më shumë përmbajtje ekskluzive për abonentët “pro”, përgjatë muajit të fundit.
Stat News ka bërë pa pagesë të gjithë artikujt për koronavirusin ose lidhur me pandeminë, e për dy muajt e parë të këtij viti ka pasur rritje të lexueshmërisë me 225%.
Media njujorkeze The Strategist është mbështetur fortazi në e-commerce me guida dhe shpjegime të detajuara për produkte që duhen blerë për raste emergjencash.
Business Insider, CNET, Wired, Gizmodo, T3 janë mbështetur gjithashtu në tregtinë online, te pajisjet e zyrës, punës, karriget më të rehatshme, duke marrë parasysh që njerëzit po punojnë nga shtëpia.
Protocol sapo lancoi një seri takimesh virtuale, për të gjetur një mënyrë për të mbushur hapësirat boshe.
The Texas Tribune ka lancuar evente virtuale dhe bisedave me gazetarët.
PopSugar Fitness lancoi “Active”, një platformë për t’u regjistruar në klasa online workout-i, duke lejuar fillimisht abonentët të abonohen falas.
Mindbodygreen bëri publike për të gjithë 5 nga klasat e tyre më të suksesshme dhe më të shitura në e-commerce, falas.
Hearst Magazines e shtyu abonimin falas të videove të ushtrimeve për trupin, nga 7 ditë në 30 ditë, për të gjithë.
Duket se këto përpjekje nuk kanë qenë të kota! Përpos relaksimit në tarifa, Bloomberg apo The Atlantic kanë pasur rritje të abonentëve.
Në këtë kohë krize, njerëzit janë të zhytur në botën virtuale, nga ku kërkojnë me ngulm mënyra se si të zbaviten dhe të jenë kreativ, në këto kushte që janë. Njerëzit po kërkojnë nga botuesit online të marrin informacion të përditësuar, por jo vetëm. Edhe argëtim, zbavitje, si dhe ide që i ndihmojë të manifestojnë kohën në forma interesante.
Pra, të marrin më të mirën e këtyre ditëve të vështira… Duhet thënë, madje duhet nënvizuar, se ata botues të mediave online që do të vazhdojnë të sjellin ide inovative e të gjejnë mënyra kreative dhe empatike, do të kenë sukses në rritjen e angazhimeve të audiencës, si dhe do të gjenerojnë më shumë të ardhura në ditët në vijim.
